د. وليد شرابي*
فضيحة تجسّس المملكة العربية السعودية، على هاتف رئيس الوزراء المصري، مصطفى مدبولي ،وعدد من وزراء حكومته كبيرة، هي وحديث عدد كبير من المواقع والصحف في أنحاء دول العالم – بالقطع ليس من بينها مصر – !…مدبولي حتى الأن لم يخرج بتصريح أو تعليق ،ولم يموء بكلمة !…مدبولي عامل نفسه ميّت …حقيقة، أذلّ “الأرز” أعناق الرجال!
لكن الغريب جدا ، موضوع التجسّس السعودي على تليفون مصطفى مدبولي، فلست قادرا على تخيّله.
يعني المخابرات السعودية، رايحين يشتروا برنامج تجسس إسرائيلي ،ويدرّبوا عناصر بشريّة للتجسّس ،وتشغيل البرنامج ،وبعدين يأخذوا المعلومات اللي على جهاز مدبولي يحلّلوها !
كل ده علشان يتجسّسوا على تليفون مدبولي !…ده إيه المصاريف اللي ملهاش لازمة دي ؟ا
يعني المخابرات السعودية متوقّعة، حتلاقي إيه على تليفون مدبولي غير مجموعة رسائل ليس لها لزوم،أغلبها من البيت بتقول :( هات لنا معاك نص كيلو رومي ،وربع لانشون فراخ ،وعلبة حلاوة الرشيدي الميزان نص كيلو ،و ب٧ جنيه عيش فينو ) .
طالما ميزانية السعودية فيها فلوس زيادة بالطريقة دي ، كان يمكنهم يحطُوا لعبتي أطفال في أي مول، وأهي تجيب رزقها، وتبقوا ماخسرتوش الفلوس ،وفي نفس الوقت الأطفال تفرح !
مش حرام الفلوس اللي رمتوها على الأرض ،دي علشان تتجسّسوا على جهاز مدبولي ؟!
ده احنا كمصريين ماعرفناش أن اسمه مدبولي ،إلا لمّا رياض محرز مارضيش يسلّم عليه في بطولة أمم أفريقيا.
قعدنا نسأل بعض ،مين اللي رياض محرز مرضاش يسلّم عليه ده ؟ لغاية لما عرفنا أن اسمه مدبولي !!
*مستشار قضائي مصري
(المقالة تعبّر عن الرأي الشخصي للكاتب، وليس بالضرورة أن تعبّر عن رأي الموقع)
